Старшыня Камітэта дзяржаўнага кантролю Васіль Герасімаў правёў 17 сакавіка 2022 года прыём грамадзян у Адміністрацыі Прэзідэнта Беларусі. Да кіраўніка кантрольнага ведамства звярнуліся жыхары Брэсцкай вобласці і Мінска.
Так, жыхарка аг.Альшаны Столінскага раёна паведаміла аб парушэннях зямельнага заканадаўства, санітарна-эпідэміялагічных правілаў і горадабудаўнічых норм, звязаных з будаўніцтвам яе суседзямі гаспадарчых пабудоў для ўтрымання свойскай жывёлы. Па выніках сустрэчы з заяўніцай Васіль Герасімаў даручыў работнікам Камітэта дзяржкантролю з выездам на месца вывучыць дадзеную сітуацыю, да разгляду пытання будуць прыцягнуты спецыялісты зацікаўленых службаў.
Яшчэ адзін зварот быў звязаны з нязгодай з рашэннем суда, у адпаведнасці з якім жыхарка Мінска выселена з жылога дома, пабудаванага адной з гаспадарак Мінскай вобласці. У ходзе прыёму кіраўнік кантрольнага ведамства растлумачыў парадак абскарджання судовых рашэнняў, а таксама парэкамендаваў звярнуцца ў мясцовыя органы для вырашэння пытання пакупкі пустога дома, магчыма ў іншым рэгіёне рэспублікі.
Акрамя таго, заяўнікі звярталіся па пытаннях вызвалення ад выплаты мытных пошлін і ўтылізацыйных плацяжоў за ўвезены аўтамабіль (з улікам інваліднасці дачкі заяўніцы) і абгрунтаванага расходавання бюджэтных сродкаў на рамонт арэнднай кватэры.
Усе грамадзяне, якія звярнуліся на прыём да кіраўніка кантрольнага ведамства, атрымаюць адказы ў адпаведнасці з заканадаўствам.