Старшыня Камітэта дзяржкантролю Брэсцкай вобласці Аксана Цылько правяла выязны прыём грамадзян і прамую тэлефонную лінію ў Пінскім райвыканкаме.
З наяўнымі праблемнымі пытаннямі да яе звярнуліся 7 чалавек. Пытанні заяўнікаў датычыліся жыллёвай тэматыкі, добраўпарадкавання і працоўных адносін, дзейнасці органаў выканаўчай улады, прадпрыемстваў і арганізацый раёна.
Напрыклад, жыхарка в.Бобрык прасіла адрамантаваць участак мясцовай дарогі, а таксама павялічыць частату маршруту аўтобуса Пінск-Бобрык-Мінск да двух разоў на тыдзень, пінчук паскардзіўся на парушэнні працоўнага заканадаўства, якія дапускаюцца наймальнікам, жыхарка в.Лапаціна прасіла аказаць садзейнічанне ў рамонце даху жылога дома, які знаходзіцца на балансе сельгасарганізацыі.
Адразу некалькі жыхароў райцэнтра прасілі разабрацца ў пытанні зносу прызнанага непрыдатным для пражывання дома (у ім яны зараз пражываюць) і іх магчымага рассялення.
Пасля заканчэння прыёму Аксана Цылько з прадстаўнікамі Пінскага гарвыканкама выехала па апошнім звароце, каб асабіста разабрацца ў сітуацыі і знайсці шляхі вырашэння праблемы грамадзян.
Па ўсіх астатніх зваротах дадзены тлумачэнні і выдадзены адпаведныя даручэнні.
Усе навіны