Навіны

Праблемныя пытанні ў галіне жывёлагадоўлі разгледжаны сёння на сумеснай нарадзе Урада і Камітэта дзяржкантролю. Мерапрыемства прайшло пад старшынствам віцэ-прэм'ера Леаніда Зайца і кіраўніка Камітэта дзяржкантролю Васіля Герасімава. Для ўдзелу ў нарадзе былі запрошаны прадстаўнікі Мінсельгасхарча, намеснікі старшынь аблвыканкамаў і ўсіх райвыканкамаў, якія курыруюць пытанні сельскай гаспадаркі.

Жорсткая размова тычылася пытанняў непрадукцыйнага выбыцця жывёлы, якая застаецца сур'ёзнай праблемай практычна для ўсіх рэгіёнаў рэспублікі.

У сярэдзіне мінулага года Прэзідэнт Беларусі даручыў выпрацаваць комплекс мер па кардынальным вырашэнні праблемы падзяжу жывёлы. З гэтай мэтай Урадам і Камітэтам дзяржкантролю быў прыняты план сумесных дзеянняў, які ўключае мерапрыемствы па ўстараненню прычын і ўмоў, якія садзейнічаюць склону БРЖ.

Яго рэалізацыя і жорсткі кантроль з боку КДК, Генеральнай пракуратуры, праваахоўных органаў далі пэўны вынік - у чацвёртым квартале 2022 года падзеж жывёлы скараціўся на 5,9% да адпаведнага перыяду 2021 года.

Тым не менш, у цэлым сітуацыя, звязаная з эфектыўнасцю жывёлагадоўлі, не задавальняе ні Урад, ні КДК. Леанід Заяц зазначыў, што ў 2022 годзе галіна жывёлагадоўлі спрацавала толькі на 99%, недабор прадукцыі ацэньваецца на суму 475 млн. рублёў. З-за неналежнай селекцыйна-племянной работы і парушэнняў рэгламентаў кармлення і ўтрымання жывёлы ў трох абласцях рэспублікі зніжана колькасць пагалоўя БРЖ.

У 2022 годзе ў 31 раёне рэспублікі са 118 дапушчана павелічэнне падзежу жывёлы звыш нарматыўных параметраў. Найгоршая сітуацыя ў Віцебскай, Гомельскай і Магілёўскай абласцях. Пры гэтым у асобных раёнах яна не мяняецца гадамі.

«Многія прывыклі працаваць па-старому. Праблемы і парушэнні паўтараюцца з года ў год. Не выконваюцца элементарныя патрабаванні. Пры гэтым кожны выпадак падзежу жывёлы павінен у раёне разглядацца як надзвычайнае здарэнне. Тым больш для навядзення парадку не патрэбны вялікія ўліванні, - адзначыў Васіль Герасімаў. - Але калі раней мы пыталіся з кіраўнікоў гаспадарак, то зараз гэта будзе рабіцца з кіраўнікоў раёнаў».

Па прапанове КДК за кіраўніцтвам райвыканкамаў у кожным раёне замацаваны гаспадаркі, дзе ёсць праблемы з непрадукцыйным выбыццём жывёлы. Аднак праверкі паказваюць, што нават у такіх гаспадарках выяўляюцца абуральныя факты парушэнняў.

Напрыклад, у Крычаўскім раёне выяўлены шматлікія факты парушэнняў у гаспадарцы, замацаванай за старшынёй мясцовага райвыканкама: месяц адсутнічаў камбікорм для цялят, неабходныя ветпрэпараты, элементарны ёд для апрацоўкі пупавіны. З-за зламанага халадзільніка на ферме не быў створаны банк малозіва для выпойвання яго нованароджаным цялятам (у першую гадзіну жыцця пасля нараджэння). У сцяне цялятніка зеўраў вялізны пралом, праз які ў яго свабодна забегалі бадзяжныя сабакі. Пры гэтым на ўказаны недагляд дзяржкантралёры ўказвалі гаспадарцы яшчэ ў лістападзе мінулага года. Больш за тое, пры праверцы на ферме знаходзілася дрыготкае ад холаду цяля, а побач пуставала хатка для абагравання цялят. У гаспадарцы нікому не было да гэтай справы.

За старшынёй Міёрскага райвыканкама замацаваны 2 гаспадаркі. Нягледзячы на гэта, у абодвух сельгасарганізацыях сітуацыя толькі пагаршаецца: адбываецца павелічэнне склону жывёлы і значнае зніжэнне па ўсіх асноўных паказчыках у галіне жывёлагадоўлі. Такая ж карціна і ў цэлым па Міёрскім раёне. Пытанне аб адпаведнасці займаемай пасадзе старшыні райвыканкама ў бліжэйшы час будзе пастаўлена перад Віцебскім аблвыканкамам.

На нарадзе таксама адзначана нездавальняючая арганізацыя ўсяго цыкла сельскагаспадарчых работ у Віцебскай вобласці і няздольнасць намесніка старшыні аблвыканкама наладзіць эфектыўную работу галіны.

Сур'ёзная крытыка прагучала на адрас Гомельскай вобласці. Больш як у палове гаспадарак вобласці перавышаны нарматыўны ўзровень непрадукцыйнага выбыцця жывёлы. На працягу апошніх 5 гадоў змяншаюцца вынікі працы ў галіне жывёлагадоўлі. У бліжэйшы час намеснік старшыні Гомельскага аблвыканкама, які курыруе пытанні сельскай гаспадаркі, будзе падвергнуты пераатэстацыі.

У ходзе нарады прэтэнзіі агучаны ў адрас Дзяржаўнай ветэрынарнай службы, работнікі якой павінны забяспечваць кантроль за ўтрыманнем і кармленнем жывёл. Нягледзячы на шматлікія прадпісанні, вынесеныя ветслужбай, эфектыўнасць яе работы застаецца нізкай. Пры гэтым парушэнні ўтрымання і кармленні жывёлы з'яўляюцца асноўнымі прычынамі яго склону.

Многае залежыць ад якасці кармоў. На нарадзе былі прыведзены прыклады, калі для скормлівання жывёле без правядзення неабходных аналізаў даваўся няякасны сянаж. Кіраўніцтва гаспадаркі заклапацілася гэтым толькі пасля таго, як пачаўся падзеж жывёл.

Леанід Заяц і Васіль Герасімаў запатрабавалі прыняць жорсткія меры па навядзенні парадку ва ўсіх гаспадарках. Бліжэйшай кропкай адліку стануць вынікі працы за першы квартал. Кіраўніцтва аблвыканкамаў і райвыканкамаў павінна забяспечыць выкананне ўсіх мерапрыемстваў па ўстараненню прычын выбыцця жывёлы. У адваротным выпадку Урадам і КДК будуць прапанаваны самыя жорсткія кадравыя рашэнні ў адносінах да кіраўнікоў абласной і раённай вертыкалі.

Па выніках праверак КДК у 2022 годзе за парушэнні тэхналагічнай дысцыпліны, ветэрынарна-санітарных правілаў, безгаспадарчасць да дысцыплінарнай адказнасці ўжо прыцягнуты старшыні 31 райвыканкама. Акрамя таго, па ўстаноўленых кантрольным ведамствам фактах утойвання падзежу жывёлы распачаты 122 крымінальныя справы.   Усе навіны