Калегіяй КДК Гомельскай вобласці разгледжаны вынікі кантролю за выкананнем у рэгіёне даручэнняў Кіраўніка дзяржавы ў сферы меліярацыі і адпаведных мерапрыемстваў Дзяржпраграмы «Аграрны бізнес» на 2021-2025 гады.
У пасяджэнні прынялі ўдзел кіраўнікі Гомельскага аблвыканкама, шэрагу яго структурных падраздзяленняў, упраўленняў па сельскай гаспадарцы і харчаванні райвыканкамаў, меліярацыйных арганізацый вобласці.
Адзначана, што ў цэлым у вобласці выконваюцца паказчыкі ўводу ў сельгасабарот зямель пасля меліярацыйных работ (за тры гады ўведзена амаль 29 тыс. га). Разам з тым у рабоце па меліярацыі зямель ёсць шэраг праблем і недапрацовак, а таксама незадзейнічаных рэзерваў павышэння яе эфектыўнасці.
Так, кантрольнымі мерапрыемствамі выяўлены землі, якія не выкарыстоўваюцца ў сельгасабароце, у меліярацыю якіх укладзены бюджэтныя сродкі. Толькі ў 2023 годзе выяўлена больш за 500 га такіх зямель у Брагінскім, Веткаўскім, Лоеўскім, Светлагорскім і Хойніцкім раёнах.
Устаноўлены выпадкі выбару і ўключэння ў праекты асобных участкаў меліяраваных зямель, на якіх выкананне работ немэтазгодна (нізкабальныя і зарослыя лесам участкі). Таксама выяўлены факты недакладнасці эканамічных разлікаў акупляльнасці праектаў. Напрыклад, бізнес-планам па аб'екце рэканструкцыі ў адной з гаспадарак Буда-Кашалёўскага раёна прадугледжана павелічэнне на 1,4 млн. рублёў гадавога прыбытку гаспадаркі пасля ўключэння ў гаспадарчы абарот 205 га рэканструяваных зямель. У той жа час за 2022 год прыбытак гаспадаркі аказаўся значна меншым. Пры такіх параметрах істотна ўзрасце і тэрмін акупляльнасці праекту.
У шасці меліярацыйных арганізацыях выяўлена завышэнне кошту аплачаных (прад'яўленых да аплаты) за кошт бюджэтных сродкаў работ па культуртэхнічнай меліярацыі - на агульную суму 59,5 тыс. рублёў.
Таксама ёсць прэтэнзіі да падрыхтоўкі і перападрыхтоўкі кадраў для меліярацыйных арганізацый.
Па выніках кантрольных мерапрыемстваў у бюджэт кампенсавана 36,5 тыс. рублёў, зэканомлена 143,3 тыс. рублёў бюджэтных сродкаў, уцягнута ў сельгасабарот больш як 500 га меліяраваных зямель, прыцягнута да дысцыплінарнай адказнасці 19 службовых асоб.
Удзельнікі калегіі абмеркавалі прычыны выкрытых недахопаў і парушэнняў, праблемныя пытанні і шляхі іх вырашэння.
Усе навіны