Навіны

Камітэтам дзяржаўнага кантролю ўстаноўлена, што мясцовымі органамі ўлады і сельгасарганізацыямі не прымаюцца належныя меры па правядзенні асенне-палявых работ у аптымальныя агратэхнічныя тэрміны. У выніку ў шэрагу рэгіёнаў рэспублікі сяўба азімых збожжавых культур, уборка кукурузы на зерне і сілас, цукровых буракоў, бульбы, саломы, уздым зябліва вядзецца маруднымі тэмпамі.

У рэспубліцы застаюцца плошчы недасеяных азімых збожжавых культур (каля 16 працэнтаў на 05.10.2023), пры тым, што аптымальныя агратэхнічныя тэрміны сяўбы ў некаторых рэгіёнах ужо завяршыліся. Напрыклад, у сельгасарганізацыях Рэчыцкага раёна план сяўбы азімых збожжавых культур выкананы толькі на 45 працэнтаў (на 05.10.2023). Пры існуючых тэмпах сяўбы для завяршэння работ спатрэбіцца яшчэ больш за месяц. Аналагічная сітуацыя ў гаспадарках Буда-Кашалёўскага, Чашніцкага, Гарадоцкага, Дрыбінскага, Круглянскага раёнаў.

У шэрагу гаспадарак рэспублікі сяўба азімых збожжавых культур праводзіцца без унясення мінеральных угнаенняў або з унясеннем толькі асобных іх відаў (факты ўстаноўлены ў 21 сельгасарганізацыі), па няякасна падрыхтаванай глебе і неадрэгуляванымі пасяўнымі агрэгатамі (у 17). Напрыклад, у ААТ "Літусова" Сенненскага раёна (на 29.09.2023) без унясення мінеральных угнаенняў была праведзена сяўба азімай пшаніцы на 228 га. У КСУП "Спадарожнік-Агра" Лагойскага раёна на 28.09.2023 ва ўрочышчы "Сукневічы" (55 га) праведзена сяўба азімага трыцікале па няякасна падрыхтаваным участку, у выніку частка насення пасля заладкі знаходзілася на паверхні глебы.

Устаноўлена, што на месцах неабгрунтавана зацягваюцца тэрміны ўборкі кукурузы на сілас. На 05.10.2023 яна ўбрана толькі на 67 працэнтаў запланаваных плошчаў. Пры існуючых тэмпах на завяршэнне ўборкі спатрэбіцца больш за 20 дзён, а асобным раёнам пры непрыняцці мер па нарошчванні тэмпаў - больш за месяц.

Недастатковымі тэмпамі вядзецца ўборка кукурузы на зерне. На 05.10.2023 убрана 32,8 працэнта плошчаў. Пры гэтым сельгасарганізацыі шэрагу раёнаў Магілёўскай вобласці (Бялыніцкі, Гарэцкі, Дрыбінскі, Крычаўскі, Круглянскі, Хоцімскі) на ўказаную дату яшчэ не пачалі ўборку кукурузы на зерне.

Па выніках праверачных мерапрыемстваў Камітэтам дзяржкантролю прапанавана Ураду сумесна з Мінсельгасхарчам і аблвыканкамамі аператыўна прыняць меры па завяршэнні ўборачных і палявых работ у сціслыя тэрміны.   Усе навіны