Камітэт дзяржкантролю працягвае кантроль за аднаўленнем і эфектыўным уцягваннем у сельгасабарот меліяраваных зямель, а таксама за законнасцю атрымання, эфектыўнасцю і мэтавым выкарыстаннем бюджэтных сродкаў, што выдзяляюцца на гэтыя мэты.
У ходзе кантрольных мерапрыемстваў, праведзеных у жніўні гэтага года, устаноўлены шэраг парушэнняў.
Так, выяўлена 3829 га меліяраваных за кошт бюджэтных сродкаў зямель, якія не выкарыстоўваюцца. Гэтыя ўчасткі зарастаюць пустазельнай расліннасцю, што ў далейшым запатрабуе дадатковых выдаткаў на іх апрацоўку.
Напрыклад, у ДП «Межава-Агра» Аршанскага раёна на 19.08.2024 не ўцягнута ў гаспадарчы абарот больш за 300 га меліяраваных зямель. Рэканструкцыя іх праводзілася з кастрычніка 2022 па чэрвень 2023 года.
У КСУП «Ваверка-Агра» Лідскага раёна ў 2021 годзе адрамантаваны каналы меліярацыйнай сістэмы «Ваверка» коштам 117 тыс. рублёў. Разам з тым названай гаспадаркай на 20.08.2024 на плошчы больш як 100 га прадукцыя раслінаводства не вырошчвалася. Уся плошча пакрыта высокай пустазельнай расліннасцю - святаяннікам, асотам, пырнікам.
У КСУП «Пяршаі-2014» Валожынскага раёна з 31 га рэканструяванай меліярацыйнай сістэмы ў 2023 годзе не ўцягнуты ў сельгасабарот 29 га. Кошт выкананых меліярацыйных работ склаў 276 тыс. рублёў.
Аналагічныя факты ўстаноўлены і ў іншых рэгіёнах рэспублікі.
Часта меліяраваныя землі не ўключаюцца ў сельгасабарот з-за няякаснага правядзення на іх работ прадпрыемствамі меліярацыйных сістэм (ПМС). У выніку на шэрагу такіх участкаў застаюцца вымачкі, адбываецца падтапленне і пераўвільгатненне ворнага пласта глебы.
Напрыклад, у Магілёўскім раёне 86 га ў ААТ «Палыкавічы» не ўведзены ў абарот, паколькі пры правядзенні меліярацыі ААТ «ПМК-93 Водбуд» Магілёўскага раёна не забяспечыла належнага водаадвядзення. На культур-тэхнічныя работы затрачана 132,6 тыс. руб.
Таксама ўстаноўлена, што рэканструкцыя меліярацыйных сістэм, доглядныя работы на іх вядуцца маруднымі тэмпамі. Напрыклад, у першым паўгоддзі 2024 года рэканструкцыя меліярацыйных сістэм і новае асушванне праведзена ў цэлым па краіне ўсяго на 22% ад гадавога задання.
Акрамя таго, у ходзе праверачных мерапрыемстваў устаноўлены факты прыпісак ПМС выкананых работ пры правядзенні меліярацыйных мерапрыемстваў, што прывяло да незаконнага атрымання бюджэтных сродкаў у суме 259,5 тыс. рублёў.
Па выяўленых Камітэтам дзяржкантролю фактах безгаспадарлівасці, незаконнага атрымання бюджэтных сродкаў і нямэтавага іх выкарыстання ў першым паўгоддзі 2024 года да дысцыплінарнай адказнасці прыцягнуты 43 службовыя асобы, да адміністрацыйнай - 6. Узбуджаны 4 крымінальныя справы.
Уся актуальная інфармацыя - у тэлеграм-канале КДК
Усе навіны