Прадстаўнікі Камітэта дзяржаўнага кантролю прынялі ўдзел у X Форуме рэгіёнаў Беларусі і Расіі, які праходзіў з 26 па 28 чэрвеня 2023 года ва Уфе (Расійская Федэрацыя).
У рамках Форума кіраўнікі камітэтаў дзяржкантролю Віцебскай вобласці Уладзімір Гадзяцкі і Гомельскай вобласці Аляксей Іглікаў прынялі ўдзел у пленарным пасяджэнні і рабоце секцыі "Супрацоўніцтва рэгіёнаў, раёнаў і гарадоў Расіі і Беларусі як важнейшы фактар умацавання Саюзнай дзяржавы". Падчас мерапрыемстваў абмеркаваны актуальныя пытанні ўдасканалення арганізацыйных і прававых механізмаў устанаўлення сувязей паміж рэгіёнамі дзвюх краін. Адзначана наяўнасць вялікага патэнцыялу развіцця супрацоўніцтва рэгіёнаў у гандлёва-эканамічнай, навукова-тэхнічнай, сацыяльна-культурнай і гуманітарнай сферах.
На палях Форума рэгіёнаў таксама адбыўся сумесны круглы стол, у якім прынялі ўдзел кіраўнікі тэрытарыяльных органаў КДК Беларусі і Кантрольна-падліковай палаты (КПП) Рэспублікі Башкартастан. Аляксей Іглікаў і Уладзімір Гадзяцкі праінфармавалі расійскіх калег аб рабоце па кантролі за выкарыстаннем бюджэтных сродкаў, што выдзяляюцца на будаўніцтва аб'ектаў, аб практыцы кантролю за эфектыўнасцю функцыянавання сістэмы аховы здароўя і аптымізацыі залішніх расходаў у эканоміцы і сацыяльнай сферы.
Таксама кіраўнікі КДК Віцебскай і Гомельскай абласцей азнаёміліся з практыкай правядзення КПП Башкартастана аўдыту ў дарожнай дзейнасці, а таксама рэалізацыяй вынікаў кантрольных і экспертна-аналітычных мерапрыемстваў на прыкладзе ГУП "Уфаводаканал".
Па выніках удзелу ў X Форуме рэгіёнаў Расіі і Беларусі падпісаны пагадненні аб супрацоўніцтве і ўзаемадзеянні паміж Камітэтамі дзяржкантролю Віцебскай і Гомельскай абласцей і Кантрольна-падліковай палатай Рэспублікі Башкартастан.
Пагадненні прадугледжваюць:
абмен вопытам па асноўных напрамках знешняга дзяржаўнага кантролю і аўдыту, у тым ліку правядзенне даследчых праектаў, семінараў, канферэнцый;
узаемадзеянне ў сферы прафесійнага навучання і павышэння кваліфікацыі кадраў;
абмен інфармацыйна-даведачнымі матэрыяламі ў сферы знешняга дзяржаўнага кантролю і аўдыту.