Камітэт дзяржаўнага кантролю Гродзенскай вобласці праверыў, як рэалізуюцца мерапрыемствы падпраграмы "Культурная спадчына" Дзяржаўнай праграмы "Культура Беларусі", на рэалізацыю якой толькі на Гродзеншчыне ў 2023 годзе выдзелена 25,8 млн. руб.
Вынікі кантрольных мерапрыемстваў паказалі, што ў асобных установах вобласці не створаны ўмовы па захаванасці музейных прадметаў.
Напрыклад, у фондасховішчы аднаго з музеяў у г. Лідзе адсутнічалі мікракліматычныя ўмовы, неабходная мэбля для захоўвання музейных прадметаў. З-за недастатковай плошчы фондасховішча габарытныя экспанаты захоўваюцца ў калідорах, многія з іх не пранумараваны.
У іншых установах вобласці, якія фінансуюцца ў рамках падпраграмы "Культурная спадчына", выяўлены парушэнні бюджэтнага і падатковага заканадаўства на суму больш за 1,03 млн. руб., якія цягнуць за сабой спагнанне ў бюджэт грашовых сродкаў у суме 884 тыс. руб., і факты прычынення шкоды ў суме 12 тыс. руб. Асноўныя парушэнні - завышэнні штатнай колькасці работнікаў устаноў, не пакрыццё прамых і ўскосных расходаў пры выкананні пазабюджэтнай дзейнасці, неправамернае выкарыстанне падатковых ільгот.
Акрамя таго, дзяржкантралёры ўстанавілі, што адна з гродзенскіх устаноў, якая атрымлівае субсідыю ў рамках рэалізацыі падпраграмы "Культурная спадчына", накіроўвала атрыманы ад культурнай дзейнасці прыбытак у сваё гандлёва-вытворчае падраздзяленне. Такім чынам хаваліся страты (на суму 290,6 тыс. руб.) гэтага падраздзялення.
Па выніках кантрольных мерапрыемстваў выпрацаваны прапановы па ўдасканаленні заканадаўства ў частцы штатнай колькасці ўстаноў, што дасць магчымасць пабудаваць дакладную структуру ўстаноў гэтага напрамку і забяспечыць выкананне даручэння Кіраўніка дзяржавы ў частцы эфектыўнага выкарыстання дзяржаўных сродкаў. Матэрыялы аб прычыненні шкоды накіраваны ў праваахоўныя органы для дачы прававой ацэнкі дзеянням службовых асоб.