Старшыня Камітэта дзяржкантролю Васіль Герасімаў і віцэ-прэм'ер Леанід Заяц правялі рабочую нараду па пытаннях рэалізацыі інвестпраекта ў ЗАТ "БНБК"

Старшыня Камітэта дзяржкантролю Васіль Герасімаў і віцэ-прэм'ер Леанід Заяц правялі 12 красавіка 2022 года рабочую нараду па пытаннях рэалізацыі ЗАТ "Беларуская нацыянальная біятэхналагічная карпарацыя" інвестыцыйнага праекта "Арганізацыя высокатэхналагічнай аграпрамысловай вытворчасці поўнага цыкла на 2016 - 2032 гады". Інвестпраект, якім прадугледжана будаўніцтва вытворчасцей канцэнтраваных камбікармоў, прэміксаў і амінакіслот, рэалізуецца з 2016 года. Аналагаў гэтаму высокатэхналагічнаму прадпрыемству няма на постсавецкай прасторы. Тут ужо пачаты выпуск прадукцыі. На сённяшні дзень унутраны рынак рэспублікі адносна амінакіслот практычна поўнасцю забяспечваецца за кошт імпарту. Вытворчасць амінакіслот ЗАТ "БНБК" дасць магчымасць у поўным аб'ёме закрыць патрэбнасці ўнутранага рынку ў гэтай прадукцыі, а таксама рэалізаваць яе на экспарт. У адпаведнасці з даручэннем Кіраўніка дзяржавы Камітэт дзяржаўнага кантролю ажыццяўляе кантроль за ходам выканання інвестпраекта. У ходзе сённяшняй нарады абмеркаваны ў першую чаргу пытанні збыту прадукцыі і забеспячэння поўнай загрузкі вытворчасцей. Прадугледжваецца, што айчынныя сельгаспрадпрыемствы павінны атрымаць па прымальных цэнах амінакіслоты, прэміксы, а таксама якасныя камбікармы. Напярэдадні ў Камітэце дзяржкантролю з удзелам прадстаўнікоў дзяржаўных і наглядных органаў быў абмеркаваны шэраг пытанняў, звязаных з ходам будаўніцтва і прыёмкі аб'ектаў інвестпраекта ў эксплуатацыю. Таксама ў ходзе нарады з удзелам намеснікаў старшынь аблвыканкамаў абмеркаваны праблемныя пытанні пасяўной кампаніі. Гатоўнасць да вясенняй сяўбы ў канцы сакавіка г.г. была разгледжана на пасяджэнні калегіі Камітэта дзяржкантролю. Праведзеныя пасля гэтага маніторынгі паказалі, што сітуацыя нязначна палепшылася. У той жа час па-ранейшаму асобныя сельгасарганізацыі не забяспечаны ўгнаеннямі пад поўную патрэбнасць, не ўсюды вырашаны праблемы з прыцягненнем механізатарскіх кадраў і рамонтам тэхнікі. Акрамя таго, у кожнай пятай гаспадарцы выяўлены парушэнні тэхналагічных рэгламентаў пры правядзенні сяўбы.