Сёння адбылася рабочая паездка Старшыні Камітэта дзяржаўнага кантролю ў Докшыцкі раён. Васіль Герасімаў прыняў удзел у пасяджэнні райвыканкама і наведаў шэраг сельскагаспадарчых аб'ектаў і адно з прадпрыемстваў рэгіёну.
На пасяджэнні Докшыцкага райвыканкама разгледжаны два значныя пытанні: вынікі работы сельгасарганізацый у галіне жывёлагадоўлі; ход рэалізацыі Дзяржаўнай праграмы «Камфортнае жыллё і спрыяльнае асяроддзе» на 2021-2025 гады.
Старшыня КДК звярнуў асаблівую ўвагу на выкананне даручэнняў Прэзідэнта па навядзенні парадку ў жывёлагадоўлі. У раёне павінны быць аператыўна вырашаны існуючыя праблемы пры падрыхтоўцы жывёлагадоўчых памяшканняў да зімова-стойлавага перыяду. Размова ідзе аб захаванасці кармоў для паспяховай зімоўкі жывёлы, захаванні ветэрынарна-санітарных патрабаванняў утрымання, кармлення і вырошчвання жывёл.
Акцэнт зроблены на павышэнні адказнасці кадраў за вынік і ўзмацненні кантролю за вытворча-тэхналагічнай і выканальніцкай дысцыплінай на жывёлагадоўчых аб'ектах.
Шэраг недахопаў адзначаны і па другім пытанні, звязаным з рэалізацыяй Дзяржпраграмы «Камфортнае жыллё і спрыяльнае асяроддзе». Сярод праблемных пытанняў:
выкананне даведзеных заданняў па зборы (нарыхтоўцы) другарэсурсаў;
правядзенне капітальнага рамонту жылля;
забеспячэнне жыхароў раёна якаснай пітной вадой, вырашэнне пытанняў з цэнтралізаванымі сістэмамі водазабеспячэння і водаадвядзення.
Васіль Герасімаў наведаў шэраг сельскагаспадарчых аб'ектаў. У цэнтры ўвагі - ход падрыхтоўкі да зімова-стойлавага ўтрымання жывёл. Кіраўнік КДК вывучыў сітуацыю на МТК Альхоўка ААТ «Докшыцкі райаграсэрвіс» і МТК Атрубак ДП «Гняздзілава-Агра». У абедзвюх гаспадарках адзначаны шэраг недахопаў, больш - па МТК Альхоўка, на тэрыторыі якога не было элементарнага парадку (акрамя таго адсутнічала агароджа, дэзбар'ер, не быў забяспечаны вываз арганікі).
Кіраўнікам гаспадарак і прадстаўнікам мясцовай улады дадзены даручэнні ў найкарацейшыя тэрміны навесці парадак на тэрыторыі аб'ектаў. КДК Віцебскай вобласці возьме на кантроль сітуацыю ў гэтых гаспадарках.
Таксама Старшыня КДК азнаёміўся з работай ААТ «Завод «Ветразь». Прадпрыемства спецыялізуецца на вытворчасці камплектуючых вырабаў для ліфтаў. Пры гэтым у лістападзе мінулага года тут рэалізаваны праект па арганізацыі вытворчасці па раскрою пяціслаёвага і сяміслаёвага кардону.
З кіраўніцтвам прадпрыемства абмеркаваны праблемныя пытанні загрузкі вытворчых магутнасцей, недахопу рабочых спецыялістаў, неабходнасці пашырэння і дыверсіфікацыі экспартных рынкаў.
Падчас рабочай паездкі Васіль Герасімаў разам з прадстаўнікамі КДК Віцебскай вобласці і Докшыцкага райвыканкама ўсклаў кветкі да мемарыяльнага комплексу «Праклён фашызму», дзе 22 мая 1943 года нямецкімі акупантамі была спалена вёска Шунеўка з усімі мясцовымі жыхарамі.
