Выконваючы абавязкі старшыні Камітэта дзяржаўнага кантролю Васіль Герасімаў наведаў Ашмянскі раён. У ходзе рабочай паездкі ён прыняў удзел у сумесным пасяджэнні раённага выканаўчага камітэта і сесіі раённага Савета дэпутатаў, правёў прамую тэлефонную лінію і прыём грамадзян, а таксама пабываў на прадпрыемствах рэгіёну.
На сумесным пасяджэнні райвыканкама і сесіі раённага Савета дэпутатаў было разгледжана пытанне павышэння эканамічнага патэнцыялу Ашмянскага раёна, эфектыўнасці мер па прыцягненні інвестыцый. Васіль Герасімаў указаў на неабходнасць выпрацоўкі выразнай стратэгіі развіцця рэгіёну, акцэнтаваўшы ўвагу на зніжэнні сабекошту прадукцыі і своечасовай мадэрнізацыі вытворчасцей. Пры гэтым ён адзначыў недастатковую работу мясцовых уладаў па прыцягненні інвестыцый.
Пасля заканчэння пасяджэння Васіль Герасімаў разгледзеў звароты жыхароў раёна. Пытанні тычыліся капітальнага рамонту жылфонду, водазабеспячэння на вёсцы, добраўпарадкавання вуліц і тэрыторый, аплаты за жыллёва-камунальныя паслугі. Канкрэтныя даручэнні дадзены па ўсіх зваротах, якія паступілі.
Напрыклад, жыхары вул. Савецкай у райцэнтры звярнуліся за садзейнічаннем ва ўстройстве ліўневай каналізацыі і добраўпарадкаванні вуліцы, якую пасля дажджоў залівае вадой. Васіль Герасімаў даручыў прыняць часовыя меры па накіраванні сцёкаў у каналізацыю і забяспечыць праход для пешаходаў. Пры гэтым у бліжэйшы час неабходна пралічыць усе магчымыя варыянты вырашэння праблемы і выбраць аптымальнае.
Таксама ў ходзе рабочай паездкі выконваючы абавязкі старшыні Камітэта дзяржаўнага кантролю азнаёміўся з дзейнасцю транспартна-лагістычнага цэнтра «Каменны Лог» і ЗТАА «Унісон груп».
