Панэльная сесія, круглы стол, падпісанне пагадненняў аб супрацоўніцтве. Сёння на палях XI Форуму рэгіёнаў Беларусі і Расіі прайшлі мерапрыемствы вышэйшых кантрольных органаў Беларусі і Расіі
27.06.2024
Сёння адбылася панэльная сесія Камітэта дзяржкантролю Беларусі і Падліковай палаты Расіі па тэме «Інавацыі, як важнейшы фактар эканамічнай бяспекі: агульныя мэты і прыярытэты дзяржаўнага фінансавага кантролю (аўдыту)».
Спецыяльную панэльную сесію прыняў на сваёй пляцоўцы Віцебскі абласны інстытут развіцця адукацыі. Мадэратарам выступіў дырэктар Інстытута эканомікі НАН Беларусі Дзяніс Муха.
У мерапрыемстве прынялі ўдзел прадстаўнікі Камітэта дзяржаўнага кантролю Рэспублікі Беларусь і яго тэрытарыяльных органаў, Падліковай палаты і кантрольна-падліковых органаў 6 суб'ектаў Расійскай Федэрацыі, прадстаўнікі навуковай і дзелавой супольнасці.
У ходзе спецыяльнай сесіі абмяркоўвалася значэнне вышэйшых органаў фінансавага кантролю (аўдыту) у вырашэнні пытанняў інавацыйнага развіцця Саюзнай дзяржавы, а таксама праблемы і перспектывы рэалізацыі сумесных навукова-тэхнічных, інавацыйных праектаў і праграм.
Удзельнікі сесіі абмеркавалі пытанні эфектыўнасці садзейнічання развіццю дзяржаўна-прыватнага партнёрства, уключаючы рэалізацыю буйных інфраструктурных праектаў (энергетыка, транспарт, дарогі, сувязь і іншае) за кошт дзяржаўна-прыватнага фінансавання. Таксама была разгледжана роля кантралюючых органаў у забеспячэнні эфектыўнага расходавання бюджэтных сродкаў на навуку і інавацыі, а таксама пытанні кантролю за рэалізацыяй сумесных інавацыйных праектаў, выяўлення істотных і сістэмных рызык эканамічнай бяспекі, фарміравання спрыяльнага інвестыцыйнага клімату. Пастаўлены першачарговыя задачы і напрамкі супрацоўніцтва ў інтарэсах забеспячэння тэхналагічнага суверэнітэту і імпартанезалежнасці, канкурэнтаздольнасці, паскоранага развіцця высокатэхналагічных і навукаёмістых сектараў эканомікі.
-- Забеспячэнне эканамічнай бяспекі - гэта адна з галоўных функцый як Камітэта дзяржаўнага кантролю Рэспублікі Беларусь, так і Падліковай палаты Расейскай Федэрацыі. Таму, вядома, у гэты бок мы будзем глядзець вельмі пільна, - сказаў па выніках панэльнай сесіі старшыня Камітэта дзяржкантролю Беларусі Васіль Герасімаў. -- Сёння мы абмяркоўвалі шляхі і метады, якія будзем выкарыстоўваць для таго, каб глядзець не проста на выдаткі сродкаў, а на эфектыўнасць, што зараз выходзіць на першы план – гэта галоўная задача.
Таксама адбыўся круглы стол па пытаннях адкрытасці ведамстваў пры ўзаемадзеянні з грамадствам і грамадзянамі. Прадстаўнікі Камітэта дзяржкантролю Беларусі і Падліковай палаты Расіі, а таксама абласных камітэтаў дзяржкантролю Беларусі і кантрольна-падліковых органаў рэгіёнаў Расіі абмеркавалі заканадаўчыя асновы і практыку атрымання інфармацыі ад грамадзян і яе выкарыстання ў рабоце вышэйшых кантрольных органаў.
На круглым стале разгледжаны пытанні:
рэалізацыі прынцыпу адкрытасці пры планаванні і каардынацыі кантрольнай дзейнасці;
роля знешніх камунікацый ва ўцягванні грамадзян у дзяржаўны аўдыт;
формы і практыкі ўзаемадзеяння з грамадзянамі;
інструменты эфектыўнай зваротнай сувязі з грамадствам, уплыў зваротнай сувязі на актуальнасць кантрольных мерапрыемстваў;
сацыяльныя сеткі як інструмент адкрытасці кантрольных органаў.
Аб практыцы работы па гэтых напрамках расказалі работнікі КДК і Падліковай Палаты Расіі, кіраўнікі КДК Мінскай вобласці, кантрольна-падліковых органаў Бранскай вобласці і Рэспублікі Комі.
Сёння былі падпісаны шэсць пагадненняў аб супрацоўніцтве паміж камітэтамі дзяржкантролю абласцей Беларусі і кантрольна-падліковымі органамі рэгіёнаў Расіі (Рэспублікі Комі, Бранскай, Маскоўскай, Цвярской абласцей і Масквы). Пагадненнямі прадугледжваецца абмен вопытам, магчымасць правядзення паралельных кантрольных мерапрыемстваў, семінараў і інш.
Таксама Камітэтам дзяржкантролю Віцебскай вобласці і Кантрольна-падліковай палатай Рэспублікі Башкартастан падпісаны План сумесных мерапрыемстваў на 2024-2025 гады па рэалізацыі палажэнняў заключанага ў мінулым годзе Пагаднення аб супрацоўніцтве і ўзаемадзеянні паміж гэтымі рэгіянальнымі кантрольнымі органамі.
