Камітэтам дзяржкантролю спынена маштабная супрацьпраўная схема ўхілення ад выплаты падаткаў і ўвозу ў рэспубліку па завышаных цэнах алею

Упраўленнем Дэпартамента фінансавых расследаванняў Камітэта дзяржкантролю па Віцебскай вобласці з удзелам праваахоўных органаў Беларусі і Расіі праведзена маштабная спецаперацыя па спыненні супрацьпраўнай дзейнасці кіраўнікоў трох прыватных кампаній, якія ажыццяўлялі ўвоз у рэспубліку алею (рапсавага, сланечнікавага, соевага).

Для завышэння кошту алею і ўхілення ад выплаты падаткаў паступленне прадукцыі ў Беларусь службовыя асобы гэтых кампаній афармлялі ад імя падкантрольных пасрэдніцкіх структур, зарэгістраваных на тэрыторыі Смаленскай вобласці Расійскай Федэрацыі.

Фактычна ж прадукцыя закуплялася напрамую ад расійскіх вытворцаў і ўласным аўтатранспартам беларускіх кампаній дастаўлялася ў Рэспубліку Беларусь. Пры гэтым вадзіцелям падчас шляху перадаваўся другі камплект таварасуправаджальных дакументаў, па якіх тавар па ўжо завышаным кошце нібыта пастаўляўся ад падкантрольных расійскіх арганізацый у адрас беларускіх кампаній.

У далейшым раслінныя алеі рэалізоўвалася па завышаным кошце ў адрас больш як 50 дзяржаўных прадпрыемстваў, якія выкарыстоўваюць іх для вытворчасці камбікармоў для кармлення птушкі.

Розніца ў кошце прадукцыі заставалася на разліковых рахунках падкантрольных фігурантам расійскіх пасрэдніцкіх кампаній, здымаліся наяўнасцю і выкарыстоўвалася для набыцця дарагіх аб'ектаў нерухомасці і аўтатранспартных сродкаў.

У ходзе правядзення праверачных мерапрыемстваў на тэрыторыі Расійскай Федэрацыі было ўстаноўлена, што практычна ўсе падкантрольныя кампаніі не размяшчаліся па ўказаных юрыдычных адрасах, іх бухгалтарскі ўлік вёўся ў Беларусі.

Трэба адзначыць, што супрацьпраўныя дзеянні фігурантаў пацягнулі і сацыяльныя наступствы. Падаражэнне камбікармоў у канчатковым выніку адбівалася на росце сабекошту прадукцыі (мяса птушкі), якая ў тым ліку рэалізуецца ў розніцу насельніцтву.

У дачыненні да заснавальнікаў і фактычных кіраўнікоў камерцыйных структур УСК па Віцебскай вобласці распачаты 3 крымінальныя справы па ч. 2 і ч. 3 арт. 243 (ухіленне ад выплаты падаткаў, збораў у буйным, асабліва буйным памерах) КК Рэспублікі Беларусь.

Падчас расследавання крымінальнай справы праведзены ператрусы ў офісных памяшканнях і па месцы жыхарства падазраваных. Накладзены арышт на маёмасць падазраваных, у тым ліку грашовыя сродкі, дарагія аб'екты нерухомасці і аўтамабілі агульным коштам не менш за 2 млн. руб.

Арганізатар супрацьпраўнай дзейнасці затрыманы.

Цяпер падазроныя па крымінальнай справе даюць прызнальныя паказанні. У лік кампенсацыі прычыненага ўрону імі пералічана ў бюджэт 1,2 млн. руб.

Таксама падчас расследаванняў крымінальнай справы вывучаецца пытанне магчымага маніпулявання дадзенымі суб'ектамі гаспадарання, якія пастаўлялі ў Рэспубліку Беларусь алеі, мытнымі кодамі ТН ЗЭД і адлюстравання імі ў статыстычных мытных дэкларацыях недакладнай інфармацыі.

Мэтай змяненняў кодаў ТН ЗЭД з'яўляецца атрыманне неабгрунтаваных ільгот па "ўвазным" падатку на дабаўленую вартасць (прымяненне льготнай стаўкі 10% замест базавай у памеры 20%) і атрыманне за кошт гэтага канкурэнтных пераваг у працэдурах закупак.