Больш за 60 зваротаў паступіла на "гарачую лінію" КДК па пытаннях парушэння прыродаахоўнага заканадаўства

На працягу трох дзён у Камітэце дзяржаўнага кантролю працаваў тэлефон «гарачай лініі» па пытаннях парушэння прыродаахоўнага заканадаўства. За гэты час паступіла больш за 60 паведамленняў, якія датычыліся звалак у лясах, на землях агульнага карыстання, у самавольна распрацоўваных кар'ерах і на сельскагаспадарчых землях.

Частка пытанняў была звязана са зборам і вывазам цвёрдых бытавых адходаў. Заяўнікі паведамлялі аб адсутнасці кантэйнераў для буйнагабарытных і будаўнічых адходаў, несвоечасовым вывазе смецця.

Грамадзян непакоіць скідванне каналізацыйных сцёкаў на рэльеф мясцовасці, у водныя аб'екты, а таксама высечка дрэў і кустоў пры будаўніцтве аб'ектаў. Напрыклад, жыхары Іўеўскага раёна Гродзенскай вобласці расказалі аб сліве каналізацыйных сцёкаў з вёсак Жамыслаўль і Шаркуці ў раку Гаўя. Жыхар Салігорскага раёна Мінскай вобласці звярнуўся па пытанні размяшчэння несанкцыянаванай звалкі адходаў у водаахоўнай зоне Салігорскага вадасховішча.

Камітэт дзяржкантролю правядзе аналіз інфармацыі, якая паступіла, па выніках якога будуць прыняты адпаведныя меры рэагавання.