Пасля ўмяшання КДК вырашана праблема сям'і з Пастаўскага раёна па ўладкаванні электрычнага ацяплення ў доме

Падчас прыёму грамадзян у ААТ "Пастаўскі малочны завод" да Старшыні Камітэта дзяржкантролю Васіля Герасімава звярнулася жыхарка Пастаўскага раёна. Жанчына прасіла аказаць садзейнічанне ў пераабсталяванні за яе кошт сістэмы пячнога ацяплення жылога памяшкання сацыяльнага карыстання. Для гэтага ў заяўніцы мелася важкая прычына - на яе ўтрыманні знаходзіцца дзіця-інвалід, які самастойна не можа падтрымліваць камфортную тэмпературу паветра ў доме.

Раней з гэтай просьбай жанчына звярталася ў мясцовыя органы ўлады і ў арганізацыю ЖКГ, дзе ёй адмовілі.

Па даручэнні Старшыні КДК праблемнае пытанне было вывучана Камітэтам дзяржкантролю Віцебскай вобласці. З Пастаўскім райвыканкамам прапрацаваны варыянты ўдзелу заяўніцы ў фінансаванні работ па пераўладкаванні сістэмы ацяплення жылога памяшкання.

Цяпер праблема вырашана, будаўнічыя работы па ўладкаванні электраацяплення ў доме выкананы да пачатку ацяпляльнага перыяду.