На калегіі Камітэта дзяржкантролю Гродзенскай вобласці разгледжана пытанне аб эфектыўнасці работы арганізацый, падведамасных Мінпраму

На калегіі Камітэта дзяржаўнага кантролю Гродзенскай вобласці разгледжана пытанне аб эфектыўнасці работы арганізацый Гродзенскай вобласці, падведамасных Міністэрству прамысловасці.

У рэгіёне ажыццяўляюць дзейнасць 16 арганізацый, якія ўваходзяць у холдынгі, падведамасныя Мінпраму. Як паказалі кантрольна-аналітычныя мерапрыемствы, гэтымі арганізацыямі прымаюцца недастатковыя меры па выкананні ключавых паказчыкаў эфектыўнасці і забеспячэнні бясстратнай работы.

Па выніках работы за 2018 год толькі 1 з 16 арганізацый выканала ключавыя паказчыкі эфектыўнасці, за студзень-кастрычнік 2019 года - 3 арганізацыі. За 10 месяцаў не забяспечылі выкананне задання па зніжэнні ўзроўню затрат 12 арганізацый, па тэмпах росту экспарту - 10, па рэнтабельнасці продажаў - 8, па чыстым прыбытку - 8. Пры гэтым 5 арганізацый атрымалі чыстыя страты.

Не забяспечваецца загрузка вытворчых магутнасцяў (у 6 арганізацый узровень загрузкі не перавышае 50%), зніжаюцца аб'ёмы прамысловай прадукцыі (11 арганізацый не забяспечылі тэмпы росту вытворчасці).

Не прымаюцца належныя меры па павелічэнні экспарту тавараў. Самыя нізкія тэмпы росту аб'ёмаў экспарту – у ААТ «Лідскі завод электравырабаў» (29,8%), ААТ «ВалМет» (58,8%), ААТ "Гродзенскі механічны завод» (66,4%), ААТ «Ваўкавыскі машынабудаўнічы завод» (68,2%). Большасць арганізацый не выходзяць на новыя перспектыўныя рынкі (асноўным рынкам збыту тавараў па-ранейшаму з'яўляюцца краіны СНД).

У ходзе праведзеных Камітэтам дзяржкантролю Гроднескай вобласці кантрольных мерапрыемстваў устаноўлены парушэнні парадку выкарыстання паліўна-энергетычных рэсурсаў; скажэнні дадзеных дзяржаўнай статыстычнай справаздачнасці, якія прывялі да неабгрунтаванай выплаты прэмій работнікам прадпрыемстваў; парушэнні парадку правядзення знешнегандлёвых аперацый, а таксама ўліку і захоўвання лому і адходаў чорных і каляровых металаў.

Па выніках праверак арганізацый, падведамасных Мінпраму, у 2018 годзе і студзені-верасні 2019 года даналічана ў бюджэт падаткаў на агульную суму 1,1 млн. рублёў, прадухілена вяртанне з бюджэту падатку на даданую вартасць у суме 0,4 млн. рублёў.

У некаторых арганізацыях выяўлены парушэнні патрабаванняў заканадаўства аб тэхнічным нарміраванні і стандартызацыі пры вытворчасці прадукцыі, а таксама факты невыканання прыродаахоўнага заканадаўства, заканадаўства аб абыходжанні з адходамі.

Асартымент і якасць прадукцыі асобных арганізацый не заўсёды адпавядаюць патрабаванням заказчыкаў. Ёсць нараканні ў пакупнікоў адносна якасці прадукцыі ААТ «Лідаграпраммаш», ААТ «УКГ «Лідсельмаш», ААТ «Смаргонскі агрэгатны завод», ААТ «Завод «Оптык», ААТ «Лідскі завод электравырабаў», ААТ «Лідскі ліцейна-металічны завод», ААТ «Гродзенскі механічны завод», ААТ «Ваўкавыскі машынабудаўнічы завод».

Не на належным узроўні наладжана работа па выкананні даручэння Кіраўніка дзяржавы аб навядзенні парадку на зямлі, выкананні патрабаванняў Дырэктывы №1 «Аб мерах па ўмацаванні грамадскай бяспекі і дысцыпліны».

Па выніках калегіі дадзены даручэнні арганізацыям па ліквідацыі выяўленых парушэнняў і прыняцці мер па забеспячэнні эфектыўнай работы.