Камітэт дзяржкантролю Гродзенскай вобласці выявіў недапрацоўкі ў рэалізацыі дзяржінвестпраграмы на 2019 год

На калегіі Камітэта дзяржаўнага кантролю Гродзенскай вобласці разгледжаны вынікі кантролю за ходам рэалізацыі ў рэгіёне Дзяржаўнай інвестыцыйнай праграмы на 2019 год, а таксама за эфектыўным выкарыстаннем бюджэтных сродкаў, накіраваных на будаўніцтва аб'ектаў.

Адзначана, што ў 2017-2019 гадах мерапрыемствы дзяржінвестпраграмы ў Гродзенскай вобласці ні разу не былі выкананы ў першапачаткова запланаваным аб'ёме.

Так, увод 3 з 12 аб'ектаў, запланаваных на 2017 год, быў перанесены на 2018 год; перанесены ўвод 1 аб'екта з 2018 года на 2019 год. У мінулым годзе не ўдалося забяспечыць увод у эксплуатацыю 3 аб'ектаў, у тым ліку ў г. Астраўцы. У райцэнтры не былі завершаны пусканаладачныя работы па рэканструкцыі сетак і збудаванняў каналізацыі, хоць будаўніцтва гэтага аб'екта пачалося яшчэ ў 2015 годзе. Аднак тэрміны ўводу ў эксплуатацыю неаднаразова пераносіліся з-за недапрацовак праектнай дакументацыі і неабходнасці яе карэкціровак.

Варта адзначыць, што тэрміны распрацоўкі праектна-каштарыснай дакументацыі былі парушаны па шэрагу аб'ектаў, не заўсёды забяспечвалася яе якасць, маюцца памылкі ў праектнай дакументацыі пасля праходжання дзяржаўнай экспертызы.

Калегія канстатавала, што ў Гродзенскай вобласці не прымаюцца належныя меры па кантролі за выкарыстаннем бюджэтных сродкаў, выдзеленых на рэалізацыю мерапрыемстваў дзяржінвестпраграмы, што прыводзіць да залішняга атрымання сродкаў з бюджэту.

Факты завышэння кошту будаўніцтва ў 2019 годзе выяўлены на 8 аб'ектах дзяржінвестпраграмы на агульную суму 283 тыс. рублёў. Не забяспечваецца своечасовая адпрацоўка бягучых авансаў, выдадзеных на будаўнічыя работы. Працягласць будаўніцтва некаторых аб'ектаў перавышае нарматыўную практычна ўдвая. Устаноўлены і факты няякаснага выканання будаўнічых работ.

На пасяджэнні калегіі разгледжаны праблемныя пытанні рэалізацыі ў рэгіёне дзяржінвестпраграмы. Дзяржаўным органам і арганізацыям дадзены даручэнні па ліквідацыі выяўленых парушэнняў і недахопаў, прыняцця мер па выкананні запланаваных мерапрыемстваў.